MANGA PALIYOGAT KO MAGI-IHRAM

MANGA PALIYOGAT KO MAGI-IHRAM

Inisorat i Monib M. Sarangani
Paliyogat ko magi-ihram sa ihram a Hajj ago Umrah angkai a khaaloy:
1. Giya khaphadeketi niyan ko inipaliyogaton o Allah a ped ko manga paralo o Agama niyan, ka ibarat o kazambayang sa baradiyama sii ko manga wakto niyan.
2. So kapananggilai niyan ko inisaparon o Allah, ibarat o kathamparasa, go so galbek a kalalalongan, go so kapakiphapawala.
3. Giya kapananggilai niyan sa oba niyan pekaringasa so manga Muslim, sa nggolalan ko katharo iyan odi na so galbek iyan.
4. So kapananggilai niyan ko langowan a isasapar ko masa a kapagi-ihram, a giyangkai a khaaloy:
a.      Da a mabadot iyan ko bok iyan, odi na mapotol iyan ko manga kanoko niyan a maito bo, sa opeman oba aden a kharoro ron ko masa a kapagi-ihram sa da mbabaa na da a karata iyan.
b.      Di niyan kapkhakamotanan so lawas iyan, odi na so nditaren iyan, odi na so pekananan iyan, odi na so phaginoman iyan, sa opeman oba aden a miyanged a rarad o ikhakamotan, a inikhakamotan iyan ko da niyan pen kapagihram na da a karata iyan.
c.      Di nggolawla sa ba makapatay sa panganganopen sa gilopa, odi na ba niyan kapakaleki, odi na ba makaogop sa kapendakpaon, dayon sa sekaniyan na magi-ihram.
d.      Di khapakay oba panoksam ko manga bai, odi na ba pakikawing; antaoaa ka ba ana kawingen iyan, odi na ba mbabangonan sa walay, odi na ba panaliya sa ana kabayaon, sa dayon sa sekaniyan na magi-ihram, sa giyangkai a manga galbek a isasapar na mlagidon so dato a go so bai.
Mapepento ko manga dato angkai a kaaloy:
a.      Di niyan sapengan a olo niyan sa sai a tomatanaon, ogaid na so kapkhasayapi ron a payong odi na atep a Trak, odi na so kaoto sa pagigimo na da a karata iyan.
b.      Di khapakay oba solot sa bangkala, a go so izan  iyan a nditaren a mararangkom iyan so kalangowan o lawas, odi na so sabagion, go dipen khapakay  so manga bornos[1] a go so manga sorban, go so saroar, na go so manga khof[2], inontabo amayka da a miyatoon iyan a tambed ka khapakay a somolot sa saroar, odi na na amayka da a miyatoon iyan a sandal na khapakay  a mosar sa khof, sa da a karata iyan.
*       Di khapakay ko bai sii ko masa a kapagi-ihram iyan oba solot sa gelab, odi na ba niyan sapengi so paras iyan sa Nikab odi na Borko[3], ogaid na amayka sii ko hadapan o manga dato a kena oba niyan mahram, (maana khaaros a mithapi iyan) na patot so kasapengi niyan sa paras iyan sa rantam, odi na so makasasagindaon, sa datar den anan igira a kena oba pagi-ihram.
*       Opamao makasolot so magi-ihram sa pamamanain, odi na kasapengan iyan a olo niyan, odi na makakhakamotan, odi na makabadot sa bok iyan, odi na makapotol ko manga kanoko niyan, sa kalilipatan iyan, odi na di niyan kataoan, na kena oba makapepidiya, sa paliyogaton so kitapleken iyanon, anday katanodi niyanon odi na kakenala niyanon.
*       khapakay ko magi-ihram so kasolot iyan sa Tsinilas, sising, salamin, a go so petagoon sa tangila a pepakaogop ko kapakaneg “Samma’ah”, go so rilos, go so sabitan, go so pinding a pepagenaan sa pirak a go manga karatas a di mipendaraynon.
    Khapakay  so kailis sa ihram a go so kapipi-i ron, go khapakay  pen so kakhokhongi ko olo, na go so kapamanalas, sa opamao aden a mabadot a bok sii ko datar anan, sa da thibabaa na da a karata iyan, sa datar anan mambo a da a karata opama oba kapali-i.
--------------------------------------------------------------------------------

[1] Nditaren a mananayonon so totop iyan, datar o Bathrobe.
[2] Ped sa manipis a panit a ipsolot sa a-i, datar o talompa.
[3] Ped sa klasi a nikab, a ipshapeng sa paras o manga bai.