SO HOKOMAN O ALLAH

SO HOKOMAN O ALLAH

Phoon ko Kitab i Shaikh Abdul Aziz Bin Baz (So kipapaliyogat o kipangokomen ko Hokoman o Allah)

Giyai na mapontok a sorat ago thoma  a taralbi, mipantag ko kawawajib o kakhokom sii ko hukoman o Allah, na goso kapananggilai ko kakhokom sii ko salakaw Ron.Inisorat aken gowani a mailay aken so dii nggolawlaan o sabaad a manga tao sangkai a masa sa kipeppangokomen iran ko salakaw ko hukoman o Allah, nago sii siran dii kkokom ko salakaw ko Kitab o Allah (Qur'an) agoso Sunnah o Rasulullah (Sallallahu Alaihi Wasallam), a manga hukoman a inembaalan o manosiya, sa di sasaboten o sabagi kiran so hukoman angkoto a galebek iran, nago kapesopaka den o sabaad kiran ko Allah agoso Sugo Iyan.Phangningko ko Allah a mabaloy angkai a mosawir aken a ndao ko manga tao a di makakekenal, nago mapakatadem iyan so manga tao a malilipat, nago kasabapan sa kapakatanor o manga oripen o Allah sii ko lalan Iyan a matitho, sa datar o kiyatharoaon o Allah:

"Pamakatademka ka mataan a so kapamakatadem na phakanggay a gona ko miyamaratiyaya." (Surah 51:55)

Go pitharo o Allah:

"Gowani a tarimaan o Allah so diyandi o manga tao a tiyoronan sa kitab, sa phayagen iran ko manga manosiya (so initoron kiran), sa di iran phagemaan." (Surah 3: 187)

Marayag a mataan a so kikokomen ko pandoan o Allah agoso kakhokom sii Rekaniyan na ped ko inipaliyogat o Allah agoso Sugo Iyan, nago giyanan i maphapanon o kathaoripena ko ginawa sii ko Allah, na goso dii kashaksii sa kababaloy o Muhammad a Sugo, nago mataan a so katalikodi san odina so sabagion na khasabapan ko siksa o Allah agoso ringasa Iyan, sa giyanan na mlagid san so kipendolonaan o gobirno a Muslim sii ko manga tao niyan, odina so sagorompong a manga Muslim sii ko apiya anda a darpa nago sii ko apiya antonaa a masa.Sii ko masa a kasimoket ago di kaphagayonayon, mlagid o sii ko ndolonan o manga gobirno antaa sii ko manga ompongan odina sii ko pishakatawan, naso hukoman iyan na ndatadatar a palayaden khindod sii ko Allah agoso Sugo Iyan. So Allah na kapa-ar Iyan so kapangaden agoso kanggiragiray a Sekaniyan i lebi a matitho i hukoman.Sa da a paratiyaya o tao a tiyangked iyan a so manga hukoman o manga manosiya agoso manga antangan iran na thomo adiso hukoman o Allah agoso Sugo Iyan, odina tiyangked iyan a makatitingkion ago makasasagindaon, odina ba niyan den inibagak na inisambi iyanon so manga hukoman agoso manga bitikan a pasad o manosiya, sa apiya pen paparatiyayaan iyan a so manga hukoman o Allah na aya lebi a mapiya ago tarotop ago ontol. Sa aya wajib ko langowan a Muslim agoso manga dato iran agoso manga nakoda iran, na goso langowan a moway-menda ko betad iran, na ikalek iran so Allah nago ikokom iran so hukoman Iyan ko manga inged iran, nago ilidas iran so manga ginawa iran agoso manga tao a kandadatoan iran sii ko siksa o Allah sii sa donya ago sii sa Alongan a mawri, nago makakowa siran sa thoma ko miyaolawla o manga inged a tiyalikodan iran so hukoman o Allah, sa aya tiyondog iran naso lompokan o manga tao a siyayanan iran so manga tao sa sedepan a alongan (Europe) ago inonotan iran so manga okit iran, sa minisogat kiran so kaoparik agoso kasoransorang agoso pimbarang a morala, na goso kiyapakaito o manga kamapiyaan, na goso kapekarawi tomedak o sabaad kiran ko rogo o sabagi. Sa giyanan den i mambebetad iran a makandadamar siran, sa diden thagompiya so manga betad iran, nago diden mitareg so kipapaaren kiran o manga ridoay, mipantag sii ko politika agoso antangan, inontabo o mendod siran sii ko Allah nago songkaden iran so toroan Iyan a matitho, a so inikasoat Iyan ko manga oripen Iyan ago inipaliyogat Iyan kiran, nago initiyakap Iyan kiran so balas ko Sorga.

Benar so Allah ko kiyatharoa Niyanon: 

"Satao a talikodan iyan so tadentadem Raken (paratiyaya agoso simba Raken) na sabenar a bagian iyan so maliteng a kapephagintao, nago pagoyagen Ami sekaniyan sa Alongan a mawri a bota. Tharoon iyan a hay Kadnangko, na inowakongka pagoyaga a bota, a aya betad aken na pephakailay ako, na tharoonon a dataranan so kiyapakatalingoma reka o manga tanda (toroan) Ami na linipatanka, na dataranan mambo a pelipatangka imanto." (Surah 20: 124)

Sa dapen a lawan sa kala ago kasopiit a isiksa o Allah ko tao a pindarowakaan iyan so Allah nago da niyan tarimaa so manga sogoan Iyan, sa inisambi iyan so hukoman o kaaden a malobay sii ko hukoman o Allah a Kadnan o manga kaaden, nago dapen a lawan sa kabebethangi ko tao a matatangan iyan so katharo o Allah, a mipetharo iyan ko ontol nago kikhokom iyan ko mao-olawla ago kiphayag iyan ko titho a lalan ago kitoro iyan ko madadadag, na orianiyan na inipilang iyan, ka inisambi iyanon so katharo o isa ko manga manosiya, odina so atoran o isa a inged a ped ko manga inged sa donya.Na badi katawi angkanan a manga tao a mataan a siran na miyalogi siran ko donya agoso Akhirat, sa da iran maparoli so kapagontong agoso kapakadaya sii sa donya, nago da siran pen makalidas ko siksa o Allah sii sa Alongan a Qiyamah.Phangningko ko Allah a baloyin Iyan angkai a katharo aken a mapakatadem iyan so manga tao, nago mapaka-inengka iyan siran, sa mapaginantang iran so betad iran, nago maperogorogod iran so miyanggolawla iran ko manga ginawa iran agoso manga pagtao iran, na makatanod siran na kadareketan iran so Kitab o Allah (Qur’an) agoso Sunnah o Rasulullah, ka ansiran mabaloy a titto a ped ko omat o Muhammad (Sallallahu Alaihi Wasallam) nago an mitayaw so bantogan iran sii ko manga pagtao ko liyawaw o lopa, sa datar o kinitayaw o bantogan o manga tao a miyaona-an iran (Salaf As-Salih), agoso manga tao a miyatindos a ped sangkai a omat o Muhammad (Sallallahu Alaihi Wasallam), sa taman sa kiyamilikan iran so liyawaw o lopa, nago kiyandatoan iran so donya nago miphasiyonot kiran so manga pagtao. Sa kalangolangowan anan na miyanggolawla sabap ko tabang o Allah, a so pendaorogen Iyan so manga oripen Iyan a miyamaratiyaya, a siranoto so tiyarima iran so pandoan o Allah agoso Sugo Iyan, sa obabo so manga Muslim na shaboten iran anan.Sayana-ini a mala a gadong a liyaga iran, nago sayana-ini a mala a kasalaan a miyasogok iran, nago sayana-ini a mala a tiyoba ago morka a miyatonda iran ko manga pagtao iran.Pitharo o Allah:

"Mataan a [so Qur'an] na bantoganka agoso manga omatka, na disadiden ka ipagisa rekano." (Surah 43: 44)

Go miya-aloy pen sa Hadis a miyakapoon ko Rasulullah (Sallallahu Alaihi Wasallam) a aya mapemamaana niyan na: “Mataan a so Qur'an agoso manga ped a Kitab na pagangkaten ko manga poso sii ko moriyamasa, a sii sangkoto a masa na thawarangen o manga tao a tiyoronanon nago thalikodan iran so kapembatiyaaon agoso kipephangokomenon.Sa pananggilai o manga Muslim angkai a mala a tiyoba oba kiran misogat, odina ba sii misogat ko manga moriyatao iran a kisalono sa misabap ko galbek iran. Mataan a sektano na palaya den kamimilikan o Allah ago Ron tano magendod.Go phakarombaangko pen angkai a wasiyat aken ko manga Muslim a ped iran a pephagintao a sasaboten iran so Agama Islam, ogaid na igiramawto a miyasimoket  siran na sii siran dii kokom ko manga tao a aya ipephangokom iran ko ndolondolonan iran naso manga bitikan iran agoso manga taritib iran, sa kasasayanan iran san so manga olawla o manga Jahiliyah (so manga tao ko dapen so Islam) ko mona a masa.Nago pagarapen aken ko tao a kisampay ron angkai a wasiyat aken a thawbat sii ko Allah, nago tapeleken iyan angkanan a manga galbek a isasapar, nago pangni sa maap ko Allah, nago senditen iyan so langowan a miyandosa niyan a miya-ipos, nago pakipemosawira ko manga pagari niyan a manga Muslim agoso langowan a makalilibeton, sa kitapelek o langowan a adat a kenaoba kay-Islami (Jahiliyah) odina taritib a makasosopak ko sogoan o Allah, sabap sa so kathawbat na pekaponas iyan so miyaona a dosa, naso tao a pithawbat iyan so dosa niyan na datar bo o tao a da a dosa niyan. Sa paliyogat ko manga olowan angkanan a manga tao agoso manga izan iran a mapepakatadem iran siran nago pekiwasiyat iran kiran so benar, nago kapanamaran iran a maaden kiran so manga dato a manga pipiya, kaan maparoli so kamapiyaan omiyog so Allah, nago migenek o manga tao so kapesopaka iran ko Allah agoso diiranon dii kandarowakai, sayanaman a mala a kakikinanglana o manga Muslim ko limo o Kadnan iran a so ishabapon o Allah a kakhaalin o betad iran, na goso kakipantao iran phoon ko kapepagintao a kapakarorondan ago kapakasosondong, sangko kapepagintao a makambabaya a makadadaya.Phangningko ko Allah, sa nggolalan ko manga Ingaran Iyan a manga pipiya agoso manga Sipat Iyan a manga poporo, a kalekai Niyan ko poso o manga Muslim, ka aniran masabot so katharo Iyan, nago ansiranon makapagapas, nago aniran manggalbek so pandoan Iyan, na matawarang iran so langowan a makasosopak ko sogoan Iyan, nago mabaloy so hukoman agoso kapakambabayabaya a palaya den kapaar o Allah a Isa-isa a da a sakotowa Iyan, sa datar o kiyatharoaon o Allah:

"Da a hukoman arowar ko hukoman o Allah, a inisogo Iyan a da a simbaan niyo arowar Rekaniyan, sa giyanan i Agama a ontol, ogaid na kagiya so kadakelan ko manga tao na di iran katawan." (Surah 12: 40)

So Allah i phangnian sa tabang sa kapakanggay a gona angkai a sorat na goso katawfiqi Niyan ko langowan a Muslim sii ko kakepiti ran ko hukoman o Allah, na goso kipangokomen iran ko Kitab Iyan, agoso kasongkada iran ko inokitan o Nabi (Sallallahu Alaihi Wasallam).