SO OKIT A KALAWIA KO MASJID O RASULULLAH

SO OKIT A KALAWIA KO MASJID O RASULULLAH

Inisorat i Monib M. Sarangani
1. Sonat so kasongka sa Madinah sii ko apiya antonaa a wakto, sa aya niat ka na giya kaplawiangka ko Masjid o Nabi (r), na go  giya kapzambayangkaon, ka kagiya so sambayang roo na thomo adiso sanggibo a sambayang sii ko salakaw ron, a makaliyo sa Masjid al-Haram.
2. So kalawi sa Masjid an-Nabawi na da abaon kapagihram a go  kaplabbayik, go dapen aba niyan kikokoyampet ko naihadji.
3. Anday kapakaomangka sa Masjid an-Nabawi, na sii ko kasold kaon na onaan ka so kawanan a a-ingka, na batiyaangka angakai a kaaloy:
(بِسْمِ اللهِ، وَالصَّلاةُ وَالسَّلامُ عَلَى رَسُولِ الله، أَعُوذُ باللهِ العَظِيمِ وَوَجْهِهِ الكَرِيمِ وَسُلْطَانِهِ الْقَدِيمِ مِنَ الشَّيْطَانِ الرَّجِيمِ، اللَّهُمَّ افْتَحْ لِي أَبْوَابَ رَحْمَتِكَ)
Sa datar den anan a kisosogoonon ko kapsold sii ko apiya anda a Masjid.
4. Andaden i kapakasold ka na pamakot ka zambayang sa dowa rakaat a sonat a Tahiyat al Masjid, sa opamao khaparo  sii ko Rawdha na aya mapiya, sa odi khaparo na apiya anda a darpa sa Masjid.
5. Orianiyan na songka ko kobor o Nabi (r) na tindeg ka ko hadapan iyan, sa a-adapen ka sekaniyan, orianiyan na tharoangka sa mainay a go  malinanek so:
(السَّلاَمُ عَلَيْك أيُّهاَ النُّبِيُّ وَرَحْمَةُ اللهِ وَبَرَكَاتُهُ، اللَّهُمَّ صَلِّ وَسَلِّمْ وَبَارِك عَلَى سَيِّدِنَا مُحَمَّد وَعَلَى آلِهِ وَصَحْبِهِ وَسَلِّم)
Sa opamao sompaten kaon angkai a dowa-a na da a karata iyan.
(اللّهُمَّ آتِهِ الوَسِيلَةَ وَالفَضِيلَةَ وابْعَثْهُ المَقَامَ المَحْمَودَ الذِي وَعَدتَهُ، الّلهُمَّ اجْزِهِ عَنْ أُمَّتِهِ أَفْضَلَ الجَزَاءِ)
Orianiyan na tangkiri ka sa maito sa tampar sa kawanan, ka anka matindeg so kobor o Abo Bakr, na salamangka sekaniyan, na go  pamangninka sa kada a dosa a go  ikalimo o Allah a go  masoaton.
Orianiyan na tangkiri ka peman sa maito sa tampar sa kawanan, ka anka matindeg so kobor o Omar, na salamangka sekaniyan, na go  pamangninka sa kada a dosa a go  ikalimo o Allah a go  masoaton.
6. Sonat reka a somongka sa Masjid Koba’, a makapaga-abdaska, sa pelawi-inka na go  pezambayangkaon, sabap ko kiyanggolawlaaon o Nabi (r) na go so  kinipangoyaten iyanon.
7. Sonat reka so kibentelen ka ko pelebengan sa Bakie, a ndodon so koba o Usman  (miyasoaton so Allah), na go so kibentelen ka ko koba o manga shahid sa Uhod, a ped kiran so Hamza (miyasoaton so Allah), na salamangka siran, na go pamangnin ka siran ko Allah, ka kagiya mataan a so Nabi (r) na ipembentel iyan siran, na go ipepamangni niyan siran, na go inipangendao niyan ko manga Sahaba niyan, a igira a aden a inibentel iran a manga koba a manga Muslim, na pembatiyaa iranon so:

(السَّلاَمُ عَلَيكُمْ أَهْلَ الدِّيَارِ مِنَ المُؤْمِنِينَ والمُسْلِمِينَ، وَإِناَّ إِنْ شَاءَ اللهُ بِكُمْ لاَحِقُونَ نَسْأَلُ اللهَ  لَنَا وَلَكُمُ العَافِيَةَ)
    Sa da a matatago sa Madinah a manga Masjid a go manga darpa a isosogo so kalawiaon, a liyo sangkai a manga darpa a miya-aloy, sa dingka phakaregeni a ginawangka sa bangka dii nggalbeka so da abangkaon balas, ka khapakay pen a bakaon den makakowa sa dosa. So Allah i pembegay sa Tawfik.