SO OKIT O KAPAGUMRA

SO OKIT O KAPAGUMRA

Inisorat i Monib M. Sarangani

1. Anday kapakaomangka ko mikat na sonat reka so kaplompiyo a go so kaphaigo, go so kakhakamotan sa lawas, sa diron ped so nditaren a pagihramen, orianiyan na solot ka sa ihram a Izar ago Rida (tambed ago kokos), aya thomo na so manga popoti, so bai na makapenditar sa saden sa khabayaan iyan a nditaren, asar a di phakaorarig ago di makasaginda ko manga mama a go so manga nditaren o manga kapir a manga babay, orianiyan na peniaten iyan so kaphagihram iyan sa Umrah, sa tharoon iyan so: Labbayka Umrah.
(لَبَّيْكَ اللَّهُمَّ لَبَّيْكَ، لَبَّيْكَ لاَ شَرِيكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكُ لاَ شَرِيكَ لَكَ)
Giyangkai a kaplabbayk na ipephakatanog o manga dato na di iphakatanog o manga bai, sa pakapendakelen iyan a go so kapepodiya niyan ko Allah a go so kapagistigfar. 
2. Anday kapakaomangka sa Makkah na thawafka sa Ka’ba sa makapito ka makalibet, sa sii ka dii khawa ko pantag a Hajaral Aswad sa pethakbirka, na ron ka peman dii pakatemega, sa pepodiangka so Allah nago pephamangni kaon sa saden sa kabayaaka a podipodi ago dowa-a a miyapakay, go sonat so kapthontolangka sii ko omangka makaisa makalibet, ko pageletan o Rokn al-Yamani a go so Hajaral Aswad so:
( رَبَّنَا آتِنَا فِي الدُّنْيَا حَسَنَةً وَفِي اْلآخِرَةِ حَسَنَةً وَقِنَا عَذَابَ النَّارِ ) [البقرة :201]
Orianiyan na zambayangka ko talikhodan o Makamo Ibrahim, sa apiya pen mawatankaon amayka khaparo, na odi khaparo na apiya anda a darpa sa Masjid.
Sii sangkai a Tawaf, na sonat ko dato a kazanggelaya niyan ko ihram iyan, sa thagoon iyan so look iyan sii ko kababaan o kawanan a irek iyan, na so mbala a poro iyan na sii ko diyawang a waga niyan, go sonat rekaniyan so kapagayasayas (Ar-Raml) sii ko paganay a makatlo makalibet, sa aya kapagayasayas na so kapakadilapeta ko kalakad sa khakaraniya.
3. Orianiyan na liyoka sa Safa na takedegkaon, na tontolangka so katharo o Allah:
( إِنَّ الصَّفَا وَالْمَرْوَةَ مِنْ شَعَائِرِ اللهِ ) [البقرة : 158]
Orianiyan na adapangka a Ka’ba na podiangka so Allah, nago takbir ka sa makatlo, a itatapnayingka so dowa paladka, sa ndowa-aka na dingka dii kasokasoya so dowa-angka sa makatlo, ka giyanan i sonat, go tharoangka so:
(لاَ إلهَ إِلاَّ اللهُ وَحْدَهُ لاَ شَرِكَ لَهُ، لَهُ المُلكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ)
(لاَ إلهَ إلاًّ اللهُ وَحْدَهُ، أَنْجَزَ وَعْدَهُ، وَنَصَرَ عَبْدَهُ وَهَزَمَ الأَحْزَابَ وَحْدَه ُ)
Makatlongka yini makasoy, sa opamao thangkaangka sa kakorangan anan na da a karata iyan.
Orianiyan na tanaka na za’ey ka sa sa’ey a Umrah, sa makapito ka maka-aloyan, sa malo ka dii nggagaan sangkoto a pageletan a dowa a toos a manga gadong, na pelalakaw ka sa mathangka sii ko onaan ago oriyan angkanan a dowa a toos, orianiyan na takedeg ka sa Marwa na podiangka so Allah, na nggolawlaangka roo so datar o pinggolawlangka sa Safa.
Da a misesenggay a paliyogat a dowa-a sii ko kathawaf ago kaza’ey, ogaid na so dii thawaf a go so dii za’ey, na sa pekaparowan iyan a manga dowa-a ago podipodi sii ko Allah na diniyan dii nggolalanen, odi na pembatiya sa Qur'an, sa aya pepanamari niyan na aya diniyan dii minggolalan na so manga dowa-a ago manga podipodi a miyarawat ko Nabi (r).
4. Anday kapakapasadka za’ey na pagopawka, odi na tepedingka so bok ka, na samanan na miyatarotop so umrangka, na miyapakay reka den ko oriayan nanan so langowan taman a isasapar ko kapagi-ihram, sa amayka seka na aya piniatka na Hajj Tamattu na aya taralbi reka na so kapagalot, kaan maaden so kapagopaw sii ko kakekhang sa ihram si-i ko Hajj.