dalil ko 3days 40days 4monthsDaleel ko Kalalakaw sa 3 days, 40 days ago 4 months 31 Mar So sabaad ko manga Muslim na sabap ko di ran kasasabotan angkai a galebek na gii ran pagishaw-sawn ka bid’ah kon. Gowani mambo ko di aken sasaboten angkai a soti a galebek na di ako ron masosorot. Ogaid na alhamdulilliah ka piyakisabotan raken bo o Allah (swt). Sii sangkai a kapapntagan a masa (21st Century) na so kadakelan ko manga tao na di ran kasasabotan so kalbihan ago so mga daleel angkai a maporo ago mapened a galebek. So somiyabot sangkai a galebek na kena a ba giyabo a kiphephanampayin ko kala o Allah (swt) ka gii mbiyangonen so Sunnah o Nabi (saw). Aya den a mala a antap iyan na andamanya i makasoled ago makatanor so so titho a paratiyaya sii ko puso o manga Muslim. Giyangkai a galebek na miyabangon pharoman isako 1925. So gii ron tharo sa so galebek a tableegh na bid’ah na datar o ba niyan pitharo a so galaebek o Nabi (saw) na bid’ah. Naudhobillahi mindhalik! Giyangkai a galebek na aya kiyasabapan sa kiyapakadayamang o Agama a Islam sii sa entero a dunya. Di maminos so 124, 000 a manga Sahaba o Nabi (saw) ogaid nab a den 10,000 ko manga Sahaba (ra) a miyakambalinganon sa lupa a Hejaz (Makkah/Madinah). So kadakelan kiran na sii miyamangilebeng sii ko mbala-bala a manga inged sa dunya. Biyaloy ran so da’wah a antap nago maksod o kaphephaginetao iran. Sa masa imanto na tonganay tano a phekhaawat ko Agama tano. So sabot ago panaawil o manga Muslim na miyakambidabida. Ogaid na mimbaal so manga Ulama tano sa usola inabat ko Qur’an ago Hadith a songkaden o omani mengangaran sa Muslim ko kaphenggalebeka niyan ko Agama. Da maaloy sa Qur’an o ba tano phe- Tableegh sa 3 gawii, 40 gawii odi na 4 olan – ogaid na giyangkai a manga bilangan na miyanga-aaloy sa Qur’an ago Hadith. Giyai na aden a mapapadalem sii a a Hikma o Allah (swt). Daleel ago Hikma ko 3 Days Miyapanothol o Abdullah ibn Umar (ra): “ Tiyalowan o Nabi (saw) so Abdurrahman ibn Auf a pitharo iyan: “Pagiyasa ka phakalalakaon ko seka ago so manga ped ka. Oriyan iyan na lominiyo so Abdurrahman na tiyalabok iyan so manga ped iyan. Lomiyalakaw siran na aya paganay a kiyatarusan iran a inged na giya Daumatul Jandal. So kiyapakaoma iran sangkoto a inged na min- da’wah siran ko soled o 3 gawii. Sii ko ika-telo gawii na somiyoled ko Islam so Asbagh bin Amru Al-Kabir. Sekaniyan na aya pakaasal iyan na Christian ago sekaniyan I kapapanatagan a datu sangkoto a inged” [Darul Qutni] So darepa a katatagoan ko manosia na ayaon den gii makambiyat. So tao a matatago ko darepa a ndodon so Imaan, amaal ago so akhlaq a manga pipiya na khasabapan sa kapagedam o puso iyan sa mamis a paratiyaya na taros a mbaloy a mapiya ai parangay. Sii ko masa o Nabi (saw) na miyapanothol a igira a aden a madadakep iran ko manga ridowai ran iphagiket iran ko posti sii sa soled a Masjeed Nabawi. Aya antap iran roo na anden phekailay o bihag iran so manga pipiya a ammal iran. Sii ko Saheeh Bukhari, na aden a miyapanotholon a sakatao a mama a aya ngaran iyan na so Sumamah bin Ausal a phoon ko bangensa a Hanafiah. Miyadakep sekaniyan o manga Sahaba (ra) na iniketan iran sa soled a masjeed. Sii ko soled do telo gawii na piyakisima iranon so manga amaal iran datar o Ta’leem wa Ta’lum, Ibadah ago so dhikr, so Khidmat iran ko manga ped iran. Sii ko paganay a gawii na da iran den mategel o ba soled ko Agama angkoto a sakatao a mama. Sii ko ika- dowa gawii na sakamaoto. So kiyaoma o ika-telo gawii na piyakibokaan o Nabi (saw)taros a piyakabaling iyan ko phoonan iyan. Oriyan o kiyabokai ron na aden a miyagedam o puso a hidayat na magaan so magaan na miphaigo. Komiyasoy sekaniyan ko Nabi (saw) na sii niyan miyaoma sa masjeed Nabawi na pitharo iyan ko Nabis (saw) a soled ko Islam. Giyanan so rarad o darepa a ndodon so amaal o Nabi (saw). Sii bo ko telo gawii na kiyasabapan sa kiyatagoi sa hidayat ko Sumamah bin Ausal. Salakaw sii pen, na andang tano den a phekhaneg ko manga ulama tano so insarat o Nabi (saw) igira aden mbokaan iyan a juma’at pantag sa kan-da’wah ago kan-jihad. 1. Oba kano kiran pakitidawa ko onaan o kambegi niyo kiran sa da’wah ko soled o telo gawii. 2. Oba kano pamono sa manga wata, manga babai ago so manga totoa a maga lolobay kiran. 3. Oba kano paminasa sa manga tamok, pamomolaan ago so manga pageper. So Nabi Zakariyyah (AS) miyakatowa den. Gowani ko makandingan-ndingan sa moriyatao niyan na inipakaisha iyan ko Allah (swt): “Ya Allah, antonaa I karina ko kambeging ka raken sa moriyato aken a miyalokes ako den ai?” So Allah (swt) na simbag iyan so pakaisha o Nabi Zakariyyah a minidaptar sa Qur’an: “Pitharo iyan: Kadenan ko! Begi akong ka sa nanao! Pitharo o (Malaikat): A aya nanaongka na dingka mipembitiyarai so manga manosia ko soled o telo gawii inonta o kaperoayat. Na phethademing ka so Kadnan ka sa madakel, go phethasbik ka sii ko kagabi-gabi ago so kapita-pita” [Al-Imran (3):41]. So manga Mufassirin na tiyapsir iran angkaya a miyaaloy a ayat – a aya nanao sa katharimaa o Allah (swt) ko pangni o Nabi Zakariyyah na di sekaniyan makipembitiyarai ko manga manosia sii ko soled o telo gawii inonta bo o kasinyas. Sangkoto a masa na inisogo o allah (swt) ko Nabi Zakariyyah a pakandakela niyan so tadem iyan ko Allah (swt), go phethasbik ko kgabi-gabi ago kapita-pita, ago pagawat niyan a ginawa niyan ko kadudunyai ka den makarani ko Allah (swt). Giyoto I sabap a so manga ulama na mialoy ran a opama ka so manosia na awat niyan a ginawa niyan ko kadudunya ka isibay niyan a ginawa niyan sii sa lalan ko Allah (swt) sii ko telo bo gawii pantag sa kasoti aniyan sa ginawa niyan, penggalebek asa manga ibadah ago paganad sa elmo ko Agama na sabenar a mala a kaphekataasar iyan ko puso iyan. Khatagoan sa babaya ko Agama, makaphetaubat taman sa makarani-rani sekaniyan ko kadenan iyan. Daleel ago Hikma ko Kalalakaw sa 40 Days So bilangan a 40 gawii miyaaloy den sa Qur’an ago Hadith. Sii tano khailay ko kiyasogoa o Allah (swt) ko Nabi Musa (as) ko kathademi niyan ko Allah (swt): “Na inidiyandi Ami ko Musa sa telo polp gawii, na inomanan Ami oto sa sapolo: Na miyaganap so wakto o diyandi o Kadnan iyan a pat polo gawii ( a kipembitiyarai Niyanon). Na pitharo o Musa ko pagari niyan a Harun: “ A sambi akong ka ko pagtao aken, go phiya-piya ka, go dingka khedega so okit o pephaminasa” [Al-A’raf (7):142]. Miyaaloy pen sa suratul Baqarah Ayat a 51: “Go gowani na miyakiphasada Kami ko Musa sa pat polo gawii. Oriyan iyan na kinowa niyo so sapi (a katohanan) ko oriyan iyan, na sekano na miyakanggolaola kano sa di ontol” [Al-Baqarah (2):51]. Sii ko manga Hadith o Nabi (saw) na miyakapera maaloy so bilangan a pat polo gawii. So Abdullah ibn Mas’ud (ra) na miyaaloy niyan a miyatharo o Nabi (saw) (sabaad ko maana niyan): “Sabenar a so kiyaadena rekano na pimbia-biatan o Allah (swt). Sekano na phoon sangkoto a miyatimo a marmo a ig ko soled o pat polo gawii ko tiyan o manga ina iyo, oriyan yan na mimbaloy a mimbathik a rogo sii ko soled o pat polo gawii. Sii peman ko oriyan o pat polo gawii na minbaloy a sapo oriyan peman na sogoon o Allah (swt) a malaikat a isorat iyan so pat: so kakan o manosia, so kaphatay niyan, so mapenggalebek iyan, ago so okoran iyan odi na marata. . . . . .[Saheeh Muslim] Sii ko manga ped a hadith a miyakatjitayan ki Anas (ra) a miyatharo iyan a pitharo o Nabi (saw): “Saden sa tao a makasambayang ko soled o pat polo gawii a peraoten iyan so paganay a takbeer o Imaam na mbalasan sa dowa a kapakalidas: kapalidas ko apoy ko naraka, ago kapakalidas ko kamu- munafiq” [Tirmidhi] Ped pen a hadith a miyakarinayag sii na miyaaloy o Nabi (saw): “ Saden sa tao a magamal a ikhlas a sowa-sowat iyan ko Allah (swt) sii ko soled o pat polo gawii na phakambowatan o Allah (swt) a puso iyan sa ongangen a sii niyan phakaokita sa dila iyan” [Tirmidhi, Ahmad, Bukhari] Madakel pen a lagidai a hadith a inosay niyan so kalbihan 0 40 gawii. Giyoto I sabap a sa tao a somenggay sa oras sa lalan ko Allah (swt) pantag bo sa kapembiyata niyan ko paratiyaya niyan, penggalebeken iyan so sogowanon o Allah (swt) ko soled o pat polo gawii na InshaAllah na khaalin so betad sii ko mapiya, pagomareg so paratiyaya niyan, ago phakasowa mangongonotan ko Kadnan iyan. Giyoto I sabap a phekhailay tano so manga pagari tano a gii siran managontaman thableegh nago phe-taskelen tano iran sa 40 gawii ka an tano mambo mapakatanor so paratiyaya (Imaan) tano ago aden tano masowa nago makenal so panagontaman o Nabi (saw). Daleel ago Hikma ko 4 Months So Ibn Juraij (ra) na miyapanothol iyan: (ped ko phekasaboton) “ Aden a miyakaphanothol raken a miyakaisa a gagawii na so Umar (ra) so gii kan- jaula o Umar (ra) sii sa Madeenah na miyaneg iyan a sakatao a bae a gii mbabayo- bayok sii ko soled a walay niyan: “Pamliinai a gagawii ko malendo ago maliboteng. Di ako pen thorogen sabap sa di raken makaoobay so karoma ko. O dibo so kapakanggalebek sa mala a dosa ko Allah (swt) na miyakasilay ako den”. So kiyanega sii o Umar (ra) ns inishaan iyan angkoto a bae:” Antonaa I maolaolang ka?” Aya minisembag o sakatao a bae: “Iphekhadali aken so karoma ko ka miyakapipira denai a somiyagad a olan-olan na da ko den mailay. “Genggenang ka a ginawang ka pakisongowang ko so karomang ka” pitharo o Umar (ra). Oriyan iyan na miyaling nggagaan so Umar (ra) na so kiyapakaoma niyan sa walay na inishaan so wata iyan a Hafsa (ra): “Ay taman a kathi a kakhatigera niyo ko karoma niyo igira sisii sa lalan ko Allah (swt)?”. So kiyanega roo o Hafsa (ra) na baden miyatulong sabap ko kiyaya iyan. Sa ba niyan den miniproayat a kemer iyan – “pageletan o telo taman sa pat olan”. Oriyan oto na phisoratan o Umar (ra) so manga ameer ko omani jumaah a phetharoon kiran a di maminos so pat olan a lalakao iran sa lalan ko Allah (swt). note: opama ka badn miy0ntod so manga sahaba (r.a.) misampay rktanu so agama o allah o da siran (daawah) lagid imanto a galebek o mga tabligh (m0balligan)