ISRA WAL MIRAJ

Aya ma'na ISRA na so kiyandadalakaw o pangahulo tano a Nabi Muhammad (salla-Allahu 'alayhi wasallam) bpon sa Masjidil Haram sumong sa Masjidil Aqsa (Jerusalem). So peman so MI'RAJ na so kiyapamanik iyan bpon sa Masjidil Aqsa bpapuro sa Langit sa aya niyan piyagedan na BURAK sa dalem a miyaka saka magabi bo kaped iyan so malaikat a si Jibreel. So kiyapakauma o Nabi sa Masjidil Aqsa na mimbaba taman sa initambed iyan so BURAK tampar ko pintuwan o Masjid ago liyumudep na piyagimaman niyan so manga Nabi ka ro siran, go sekaniyan makaliyo na piyakapamili i Jibreel sa duwa: so isa na tiyaguwan sa makalangot, so ikaduwa na tiyaguwan sa gatas. Na aya niyan pinili na so gatas, bali miyakasugat mamili ka upama bo ka aya niyan kon kinuwa na so makalangot na matadin den so manga ummat iyan.
Mapasad na minipamanik so Nabi sa Langit, na go siran makauma:

• Saya ko ikaisa pangkat o Langit na pinikiukan i Jibreel so Langit taman sa miyailay o Nabi si Adam ('alayhis salam) siyalam iyan sarta na piyakataros mambo sekaniyan ago pigkumpurmiyan i Adam ('alayhis salam) so kananabi niyan, ago pinikiilay rekaniyan o Allah (subhaanaho wata'aala) so manga ARUWAK o manga taw a paratiyaya tampar sa kawanan ago so manga ARUWAK o  manga taw a daruwaka tampar sa biwang.
• Saya ko ikaduwa pangkat o Langit na miyailay niyan si Yahya ago si Esa ('alayhis salam).
• Saya ko ikatlo pangkat na si Yusof ('alayhis salam).
• Saya ko ikapat pangkat na si Idris ('alayhis salam).
• Saya ko ikalima pangkat na si Haron ('alayhis salam).
• Saya ko ikanem pangkat na si Musa ('alayhis salam).
• Ago saya ko ikapito pangkat na si Ibraheem ('alayhis salam) a makatataligkod sa BAYTAL MA'MOUR (بيت المعمور) a aya kadakel a peludep ron a manga malaikat sa uman den gay na pitupulong-gibo a manga malaikat, igira lumiyo siran na di den siran embalingan.

Uman i mauma niyan ko manga Nabi na salamen niyan siran sarta na pakatarusen niran mambo sekaniyan ago langon iran na pigkumpurmiyan niran so kananabi niyan ago ibpenduwa iran sa mapya.
Mapasad na minipuro sekaniyan ro sa SIDRATOL MUNTAHA (سدرة المنتهى) – Kayo a tanto a matibangkal a bidtuwan sa NABQ (شجرة النبق) ro sa puro a ikapito lapis a Langit, ubay o giyuto ba a Kayo na so Surga. Ini ilham den o Allah (subhaanaho wata'aala) ko Nabi so nganin a ini ilham ron, ago ro ba inisugo o Allah (subhaanaho wata'aala) so sambayang sa limapulo sa uman gay. Mapasad na mimbalingan den so Nabi ugaid na kiyasagadan niyan si Musa ('alayhis salam) na inidsan i Musa ('alayhis salam):  tuna i inisugo reka o Kadenan ka? Tigo Nabi: inisugo Niyan so limapulo a sambayang. Tigo Musa ('alayhis salam): so manga ummat ka na diran magaga, embalingan ka ko Kadenan ka pangni angka i kakurangan, sabap ro na diningilan o Nabi si Jibreel. So kiyadingil o Nabi ki Jibreel na signal uto sa pikimbalingan sekaniyan ro sa SIDRATOL MUNTAHA (سدرة المنتهى), miyakadsignal mambo si Jibreel sa o giyuto i kabaya ka na imbalingan ko seka! Sabap ro na inipuro sekaniyan i Jibreel, na piyangni o Nabi ko Kadenan i kakurangan so limapulo a sambayang, mapasad na mimbaba so Nabi na kiyasagadan niyan peman si Musa ('alayhis salam) liyabit iyan ron i kiyakurangan, tigo Musa ('alayhis salam): embalingan ka ko Kadenan ka pangni angka i kakurangan pen, taman man sa miyakapira makambabalingan so Nabi ka uman niyan kasagadan si Musa ('alayhis salam) na pakambalinganen niyan taman sa so limapulo a sambayang na miyabaloy a limatiman bo, na bpakambalinganen pen i Musa ('alayhis salam) ugaid na so Nabi na da den makaraw embalingan. Kagya ka mawto na limo o Allah (subhaanaho wata'aala) ka piyakalebudan tano Niyan sa uman i satiman a sambayang na aya niyan timbang na sapulo a baras, bali samawto na timbang bon a limapulo so sambayang.
Kataya so miyangailay o Nabi saya ko kiyapamanik iyan sa Langit:

• Miyailay niyan so pattiman a lawasaig: so duwatiman na makasusulen ago so duwatiman peman na mipapayag. Bali miyakaidsa o Nabi ki Jibreel entuna bawto a manga lawasaig uto? Tigo Jibreel: so duwatiman a lawasaig a makasusulen na giyanan so lawasaig sa Surga, so peman so duwatiman a lawasaig a mipapayag na giyanan so lawasaig a Nile (River Nile) ago Furat (River Euphrates).
• Miyailay niyan so malaikat a si Malik, sekaniyan so malaikat a bpagunong ko Naraka a da den a kagkala, so buntal iyan na tanto a makagirek ka kena ba lagid o buntal a taw.
• Miyailay niyan so Sugra ago so Naraka.
• Miyailay niyan so manga taw a kiyan niran atawka siyalimbot iran so manga tamok o manga inayatin (da lukes iyan), na so manga mudseng iran na lagid o manga mudseng a Unta, bpamangetugen so manga ngari iran sa tog a bpon sa apoy sa Naraka taman sa bpamlambas so tog ko manga pudit iran.
• Miyailay niyan so manga taw a kiyuman sa Riba, na midsasakembot so manga tiyan niran sa di den siran bpamakagaga dtingkal ko gkambetadan niran, taman sa gkangadakudak den siran o manga pagetaw i Fir'awn a ibpendendeg ko Naraka.
• Miyailay niyan so manga mama a barazina, na saya ko manga lima iran i duwa barang a sapo: sapo a mapya-masebod ago sapo a maketi-miyaredak. Na aya iran pegken na so sapo a maketi-miyaredak, ipedtagak iran so sapo a mapya-masebod.
• Miyailay niyan so manga babay a barakiyuga a mimbata sa kena ba niyan wata ki karuma niyan, na aya piyakaidan kiran na miyangabitin siran sa aya miyamakaiket ko lig iran na so manga suso iran.

Uway, giyuto bon ba a magabi na mimbaba so Nabi sa Makkah, ago so kapipita na tinimo niyan so manga taw ka pinikisabutan niyan kiran so giyuto a miyanggula sarta na piyanudtol iyan kiran so miyangailay niyan a tanda o kapuro ago kapegkagaga o Allah (subhaanaho wata'aala). Tanto den a piyangimbudtod o manga taw taman sa piyamatalo iran pen so Nabi ka inidsa iran ron so Masjidil Aqsa (Jerusalem) taman ko manga pulaos iyan! Pidsatiman kiran o Nabi so giyuto a manga pakaidsa iran, pidtaro niyan pen kiran i saya ko kiya sangor iyan sa Jerusalem ago kiyambalingan niyan sa Makkah na aden a miyailay niyan sa lalan a bpakauma sa Makkah a grupo (karaban) a pendadalalag bpon sa Shaam, liyabit iyan kiran so miyaula-ula iran, so kadakel a Unta a piyagdan iran sa aya bpangunan na Unta a kulay-kaki. Benar so kadtaro o Nabi ugaid na so manga taw a supak na puringana i di bon bpamaritiyaya na migkadto den so manga pamusungan iran, ugaid na so peman so manga paratiyaya na kiyadsasanggumanan so paratiyaya iran taman sa si Abubakr As-Siddeeq na tembo kiyabedtuwan sa Siddeeq (tanto a miyangimbenar) ka apya entuna den i kiyapangimbudtod o manga taw ko Nabi na sekaniyan na paparatiyayan niyan saden sa pedtaron o Nabi.
Saya ko mapita na siyungan i Jibreel so Nabi ka inipamando niyan ron so lima a sambayang sa uman gay, so manga ukit-ukit iyan ago so manga oras a kapedsambayang. So timpo a da pen misugo so sambayang na duwa ka rak'at i kapedsambayang o Nabi sa mapita ago duwa ka rak'at sa magabi, mauto ba so kapedsambayang i Ibraheem ('alayhis salam).