SO KASULA SULA KO MAWLIDAN NABI

SO KASULA-SULA KO MAWLIDAN NABI KO BOLANA RABIUL AWWAL

1.SO KASULA-SULA KO MAWLIDAN NABI KO BOLANA RABIUL AWWAL- Na pudanan sa kapuppananayani ko manga Christian ko gi-iran kasula-sula a ko Nabi Isa (asw) igira a Christmas. So saba-ad ko manga Muslim a korangon so kunal odi na so saba-ada manga Ulama a ribati kupit, na gi-iran sula-sula-an so kinimbawata-an ko Rasoulollah (saw) ko bolana Rabiul Awwal ko oman ragon. So saba-adon na si-iran ppagaduna ko manga masjid. Sopman so saba-ad na si-iran pulumba-an ko manga walayran odi na si-iko manga darpa a tinibbaba gi-i pulimo-limodan. Pundarpaon mambo so madakula taw; wata mala a taw, ago babay-mama dun. Ago aya kalilid na aya ropa-an iyan na salakaw pun ko kabbabaloy niyan a Bid’ah ago kapanayan-sayan ko manga soranga tano sa agama na kkapakay puna pukkasaogan sa manga kapanakoto ago manga rarata a galubuk. Ibarato kapamangba-al sa manga bayok a ipundidaw ko Nabi (saw) a pukkalawanan so diyangka a kiyapakayawno Islam sa taman sa misong sa badun ma-ampit o taw a ron makapangni sa tabang sa salakaw ko Allah. Sabnar a so Rasoulollah (saw) na inisapar iyan oba tano sukaniyan bantoga sa tonganaya kilabaw a tanto a kitaralo a kasobra-an so diyangka a kiyapakayawno Islam sa kiyattaro a niyanon:

“DI NIYO TTARALON A KAPUMBANTOGA NIYO RAKUN SA BA LAGIDO KIYABANTOGA O MANGA CHRISTIAN KO (ISA) IBN MARIAM KA AYA MATA-AN NA ORIPUN AKO (O ALLAH) NA AYA TTAROA NIYO NA ORIPUNO ALLAH AGO SIYOGO IYAN” [Piyanotolo 2-kataw a Shiekh].

Ago kkapakay puna aya mabaloya panarimaono saba-ad na ba so Rasoulollah (saw) na pupakadarpa ko kalilimod iran (Giyanani kapukkabaloy niyana kapanakoto).

Sopman so kapukkasumbori ron sa manga rarata a galubuk, na ibarato kapamagidayda a sasarta-ana manga boniboniyan agoso manga puda ribata kupit a da ko sogoano Islam, ibarato manga kupito manga Sofiah a gi-iran ipamagidayda sa parun-parungan so manga kapanasbih. Ago kkapakay puna giyangkoto a kalilimod na gi-iron sumbor so babay agoso mama sa kasumbor a di mapiya a pukkasabapan sa kapuka-aduno pitna a mala.

Ago apiyapun ayaduna bunar na masisiyap so kalilimod sa diron kisaog angkai a manga rarata a miyapangaloy ka ayabo a masaon na katimo-timo ago kapamagana ago kapipiya ginawa sa lagido osayanon o saba-ad a gi-iron golawla, na kagiya a ayaduna bunar na giyanan na Bid’ah pimbabago ko agama Islam a di kabaya o Allah, “ka so langowana pimbabago ko Islam na Bid’ah, na so langowana Bid’ah na kaddaddagan”. Ago kkapakay puna badun mabaloy a po-onan o kapukka-aduno manga masa agoso manga kalilimod a di kabaya o Allah ago di niyan ikkasoat.

Aya kiyattaro amiron sa Bid’ah na sabap sa da-a miya-aloya dalil iyan sa Qur’an ago sa Hadis oba inisogo o Islam ago dapuna miyapanotola minggolawlawn ko manga Salafus Salih (So manga Ulama a titto ka lagido manga Sahaba agoso manga Tabi-in agoso miyakasalono kiran) ago dapun kasinagadi si-iko miyatindosa paganaya masa a kapago-omarugo agama Islam (a giyanan so masa o manga Sahaba agoso manga Tabi-in a miyamakasalono kiran). Ka aya mata-an na miyawri anan a kupit ka aya po-onan a kiya-adun iyan na si-iko oriyano ikapat gatosan ragon (century) o Islam a aya mittaongon na so manga Shii-a Al-Fatimiyon.

Pittaro o Imam Abu-Hafs Tajodden Al-Fakihani: Sabnara ipupakaiza sa madakul o saba-ad ko manga Al-Mubarakin so makapantag ko kappagadun sa masa o saba-ad ko manga pagtaw ko bolana Rabiul Awwal a pumbuttowan iran sa sula-sula ko Mawlidan Nabi, o ino ana paka-asal iyan ko Islam? Na aya pittaro akun kiran na da-a katawi ko ron oba giyangkanan a kapumawlid na ba aduna dalil iyan a miya-aloy sa Qur’an agosa Hadis. Ago dapun ma-aloyo ba aduna minggolawlawn ko titto a manga Ulama o Islam a kisasarigan a sirani purawatun ko agama Islam ka kukudugun iran so lalana ontol a inokitano manga Salafos Salih. Aya mata-an na giyanan na Bid’ah a pimbabago ko agama Islam a minggolalan ko manga ddaddaga manga pagtaw ago onot ko baya a ginawa o siranoto a manga pagtaw a manga bosaw. (Miya-aloy ko kitab a Arabic: Risalatol Mawrod fi Amalil Mawlid).

Pittaro i Shiekh Al-Islam/ Ibn Taymiyah : ….Ago lagidanan so pimbabago o saba-ad ko pagtaw. A odi iran pananayan ko manga Christian ko gi-iran kasula-sula a ko kinimbawata-an ko Isa (asw), odi na bbabaya iran ko Rasoulollah (saw) ago sula-sula iranon… Na kagiya a sadun sa taw a sulasula-an iyan so Mawlidan Nabi a dapay so gawi-i a kinimbawata-anon na da mapunto piya-piya ka da kapagayon-ayoni o manga panonotol na aya mata-an na da-a miyapanotol a minggolawlawn ko manga Salafos Salih. Opamabo ka mata-ana pud ko amal a mapiya na sabnar a dirandun pparon ko manga ginawa iran oba iran di minggolalan ka sirani malaoni kabnar sabap ko kilalabaw bbabaya iran ko Nabi (saw) adi sukitano, agoso kala iran a tanto i panagontaman ko manga amal a mapiya a di sukitano. Ayamana nanao sa kapukkabbabayai a tanto o taw ko Nabi (saw) agoso kala a kasusula-a niyanon na so kasonggiringi niyan ko Sunnah niyan agoso kawnoti niyan ko manga ndaowan iyan agoso kinggolalanun iyan ko manga sogoan iyan agoso kapumbatona niyan ko manga okitokit iyan sa mapayag-masolun ago isapar iyan so langowana inisapar iyan. Ago ipanolon niyan so minitalingoma niyan ago ipurang iyan sa lalan ko Allah sang-golalan ko poso iyan agoso dowa barokan iyan agoso dila (kattaro) iyan ka giyanani mata-ana inokitano manga Mohajiriin agoso manga Ansar agoso minisalono kirana pagtaw agoso siranoto a tiyondog iyan siran ko mapiya. (Miya-aloy ko kitab a Arabic: Iqtida As-Sirattal Mostaqiim a inimpidani Dr. Nasser Al-aql).

Ago madakula kiyamba-alana manga kitab ago manga sorat a ini-ongkir sangkai a miya-aloy a manga Bid’ah, mulagid so bago agoso andang ka kagiya a salakaw pun ko kabbabaloy niyana Bid’ah ago kapanayansayan na mata-ana pukkasabapan sa kapukka-aduno gi-i kasula-sula a ko kinimbawata-an ko manga puda manga taw; ibarato kinimbawata-an ko manga Awliya agoso manga ala a Shiekh agoso manga ala a datu, na pukkaluka-an iyan so pintoano manga rarata a okit a di kabaya o Allah.